کن کی اذانِ ناز کا جوہر نبی(ص) مرا
کن کی اذانِ ناز کا جوہر نبی(ص) مرا
کونین کی بہار کا جھومر نبی(ص) مرا
روشن ہے ہر ستارے میں حسنِ محمدی(ص)
سوچو تو کس قدر ہے منور نبی(ص) مرا
انسان کے ضمیر کی آنکھیں کھلیں گی جب
پلکوں سے چوما جائے گا گھر گھر نبی(ص) مرا
رحمت کرے طواف ، محمد(ص) کے نور کا
ابرِ کرم کا شبنمی محور نبی(ص) مرا
پتھر پہ اک لکیر ہے شق القمر کا باب
سنگ ریزوں کو بنا دے سخنور نبی(ص) مرا
سید(ص) ، کلیم(ص) ، اُمی(ص) ، محمد(ص) ، قوی(ص) ، خلیل(ص)
منصور(ص) ، حق(ص) ، نذیر(ص) ، مطہر(ص) نبی(ص) مرا
طہ(ص) ، بشیر(ص) ، عزیز(ص) ، رحیم(ص) ، ابطحی(ص) ، منیر(ص)
یس(ص) ، امین(ص) ، نور(ص) ، مدثر(ص) نبی(ص) مرا
نقشِ قدم رسول(ص) کا خوشبوئے دین ہے
نعلین بھی ہے جس کی معطر نبی(ص) مرا
اپنی طرف ترازو کا جھکنا محال تھا
مولا کا شکر ، شافعِ محشر نبی(ص) مرا
معراج تھی فرشتوں کی حیرانگی کی رات
بے پر بھی اترا قیس ، فلک پر نبی(ص) مرا
شہزاد قیس
• — — — — — — — — — — — — •